BJP-in Lok Sabha inthlana an candidate tur 195 puang

Bharatiya Janata Party (BJP) chuan 2024 Lok Sabha inthlan lo awm tur atana state 16 leh UT pahniha an party candidate tur, mi 195-te hming chu Inrinni khan an tlangzarh.

BJP-in candidate list an tihchhuah tak, mi 195 zinga 107-te hi hnam hnufual kan tih zinga telte an ni a, scheduled caste 27, scheduled tribe 18 leh Other Backward Classes (OBC) aṭangin mi 57-te an ni. Candidate list hmasa an tihchhuah aṭanga a lan danin, prime minister Narendra Modi chuan inthlan hnuhnung pahnih aṭanga a lo chak tawhna, Uttar Pradesh-a Varanasi seat aṭangin a chuh leh dawn a ni.

PM Modi bakah hian union minister 34-te chu candidate tura puan zingah hian an tel a, home minister Amit Shah chuan Gandhinagar aṭangin Lok Sabha seat hi a chuh dawn a, Smirti Irani chuan Amethi aṭanga a chuh dawn bakah defence minister Rajnath Singh chuan Lucknow aṭangin a chuh ve bawk ang. Madhya Pradesh chief minister hlui, Shivraj Singh Chouhan pawhin Vidisha aṭangin Lok Sabha seat hi a chuh ve dawn a ni.

Lok Sabha candidate list hmasa ber siam tur hian February 29 khan BJP hnuaia Central Election Commission (CEC) chu an ṭhu khawm a, list hmasa tihchhuahah hian Uttar Pradesh-a seat 51 aṭanga chuh tur an tarlan zinga 43 chu inthlan hnuhnung ber nen an la inang a, Delhi-ah tihdanglam ngah berin, Delhi-a Lok Sabha seat panga awm zinga paliah candidate thar puan an ni. CEC hi March 6-ah an ṭhu khawm leh dawn a, hetah hian candidate tur an la puan lohna state ṭhenkhatte ngaih pawimawh an ni ang.