WBengal inthlanah vote 71% a tla Eptuten match mixing a awm niin puh

West Bengal assembly inthlan, Phase 1-B neih zawh taka vote tla chu 71% a ni. Inthlan hi constituency 31 ah neih a ni a, vote nei mi nuai 70 dawn an awm.

Vote thlakna hi district pathum - West Midnapore, Bankura leh Burdwan huam chhungah a ni a, khaw lum tak hnuaiah vote thlak tura chhuak an ṭha thawkhat niin official-te chuan an sawi.

Election Commission(EC) official chuan district pathum aṭang hian complaint 1,100 chuang an dawng tih an sawi a, heng zinga 950 chu an chingfel a, a dangte chu thu belhchian dawl lo te niin a sawi. Vote thlakna district pathumah hian tharum thawhna pawh a thleng vek a, Burdwan district-a Jamurai booth bulah bag chhung crude bomb eng emaw zat awm chu man a ni bawk. West Midnapore district-ah Communist Party of India-Marxist (CPI-M) polling agent chu kut thlak a nih avangin damdawi in-a dah a ngai a ni.

Eptu pawlte chuan polling booth tam takah central security force-te dah an ni lo tih an sawi. West Bengal inthlan buaipuia Election Commission leh central force-te chet danah an lungawi loh thu sawiin, eptu party-te chuan rorellai Trinamool Congress (TMC) mi leh sate an duh thala an chet theihna turin TMC leh BJP inkarah 'match fixing' a awm niin an puh.

West Bengal Left Front Chairmn Biman Bose chuan, 'Hmun ṭhenkhat chuan felfai takin mipuite vote an thlak thei a, mahse hmun thenṭhatah erawh chuan TMC mite chetdan rawva tak avangin mipuiten vote pawh an thlak thei lo niin a sawi. 'Hetiang thil a thleng chung hian central force leh Election Commission chuan ngawi rengin an lo thlir a ni" a ti. Kehspur, Garbeta, Sabang, Pingla leh hmun dang emaw zatah polling booth-te chu TMC mi leh saten luhkhungin vote tla-te tichingpen niin a sawi bawk.

Bose chuan Thawhṭannia inthlan neih dan aṭang khan TMC leh BJP inkarah a ruka inremna siam a awm tih a langchiang hle a ni tiin, Election Commission of India hnenah pawh a ṭul anga action la tura ngenna a thehluh thu a sawi.

WBPCC President Adhir Chowdhury pawhin EC chu na takin a sawisel a, "Congress party chuan vote thlak ṭhat kan dil dawn a ni. Poll duty-a dah central force-te chuan an hna an thawk lo a, Sabang leh Kulti-ah vote-te ruk a ni bawk. He thil hi Narendra Modi leh Mamata Banerjee-te game thar a ni. Mipui dikna chanvo laksakna dik tak a ni" a ti.

Kum 2011 assembly inthlanah khan heng bial 31 zinga bial 17-ah hian Trinamool Congress an chak a, Congress party-in seat thum a la bawk. Left Front-in seat 11 an la a ni.

West Bengal assembly inthlan hi April 17, 21, 25, 30 leh May 5 hian neih chhunzawm leh a ni ang.