Khawkheng tuar mek Latur tan tui litre nuai 5 pe

Maharashtra-a Marathawada biala Latur khua chuan khawkheng nasa tak a tuar mek a, nimin zing khan rel hmangin tui liter nuai nga pek an ni.

Tui phurtu rel hian Thawhṭanni khan Maharashtra khawthlang lam, Miraj bial aṭangin chawhma dar 11-ah Latur hi a pan a, nimin zing dar 5 vel khan a thleng a ni. Rel-ah hian wagon 10 awmin, liter 50,000 ṭheuh an phur thei a ni.

District thuneitute chuan Latur rel station bula tuichhunchhuah lian takah heng tuite hi dahin, khaw mipuite hnenah an sem leh dawn a ni.

Maharashtra Chief Minister Devendra Fadnavis chuan state sorkar leh railway ministry chuan khaw mipuite harsatna sukian turin theihtawp an chhuah mek tih a sawi a, April 15 hian wagon 50 phurtu relin Latur khaw tan hian tui pek chhunzawm leh a ni dawn tih railway official chuan a sawi. Heng wagon-te hian tui liter 54,000 ṭheuh an phur thei dawn a, a ṭul dan angin tui hi pek chhunzawm zel an ni ang.

Delhi Chief Minister Arvind Kejriwal pawhin Delhi khawpuia chengte chu Latur khaw mite tana tui an pek theihna turin tui renchem turin a ngen. Kejriwal hian hemi chungchang hi a twitter-ah tarlangin, Latur khuaain harsatna nasa tak an tawk mek a, ṭanpui an ngai tih a sawi.

Latur khuaah hian mi nuai nga vel an cheng a ni a, khawkheng nasa tak an tuar mek a, khawchhunga tui dah khawlna tanker a awm tam tawk loh avang≠in tuiah harsatna an tawk nasa hle a, tui chawi tur hian kilometer hnih chuanga thuite an kal a ngai a ni.

Latur Mayor Shaikh Akhtar chuan sorkarin an harsatna hria a, khaw mipuite tana tui a pe chu lawmawm an tih thu sawiin, tui an dawn chu ni 15 chhung atan liter 200 zela an sem chhuah tur thu a sawi.