Temple-a kangmei chhuaka hliam tuar 1,000 an tling

Kollam, Kerala-a Pathianni zinga Puttingal temple-a halmawi leh halpuah hal vanga kangmei nasa tak chhuaka hliam tuar chu 1,000 chuang an tling niin state sorkar thuchhuah thar ber chuan a tarlang. Hliam tuar zinga 350 vel chu damdawi-inah enkawl mek an la ni.

Temple-a kangmei a chhuah hnuah police-ten mi paruk an man tawh a, tualthah tuma puhna thubuai siamsak an ni. Temple official panga pawh police kutah an inpe tawh bawk.

Chief Minister Oommen Chandy leh local official-te chuan temple official-te hnenah hian halmawi hal phalna an pe duh lo a, mahse an hal lui tho niin an sawi. Halmawi an halte hi tualchhunga siam niin, a siamnaah hian chemical hman phallohte an hmang tel niin explosive expert-te chuan an sawi.

Kangmei a chhuah hnu hian judge pakhat chuan temple-a halmawi hal khap tura ngenna a theh lut a, hei hi Kerala High Court chuan a ngaihtuah dawn a ni.