Supreme Court-in June 15 thleng AAP hun a pe

Supreme Court chuan Aam Admi Party (AAP)-in Delhi-a party office atana an hman mek, Rouse Avenue-a mi chu Delhi High Court hmunhma tihchangtlunna leh tihzauhna atana hman tura ruahman a nih avangin, AAP hi helai hmun chhuahsan tur hian June 15, 2024 thleng hun pek an nih thu a tarlang.

Chief Justice of India, DY Chandrachud ṭhut Supreme Court bench-in a tarlan danin AAP-te hi Rouse avenue-a office atana an hman mek hmunhma hi Delhi high court hnuaia district level rorelna in tihchangtlun nana hman a nih theih nan chhuahsan tur leh Lok Sabha inthlan lo awm tur avanga ngaihna thiamna nen June 15 thleng hun a pe a, SC hian AAP chu an office tur ram neih dan tur chungchangah Land and Development Office dawr turin a hriattir bawk. Supreme Court bench hian Land and Development Office chu AAP dilna a rang lama ngaihtuah tura an lo ngen ve tur thu leh, thla khat chhunga chinfelsak tura an lo nawr ve tur thu an tarlang bawk.

Hetih lai hian AAP hian Supreme Court-in Delhi high court tana ram pek AAP-in dan loa chu lai ram luah anga a tarlang chu a dik loh thu sawiin,"Ram nek emaw, luah lui kan ni lo. Helai hmun hi Delhi National Capital Territory (NCT) sorkar in December 31, 2015 khan party unit office atana hman dilna anga min phalsak tawh a ni", tiin an sawi thung.