UP police recruitment board chairperson sawn

Uttar Pradesh sorkar chuan UP police recruitment board chairperson, Renuka Mishra chu police constable hna lak exam zawhna put ru kaihhnawihah rinhlelh a nih avanga sawn a nih thu a puang.

Uttar Pradesh-ah hian February 17 leh 18 khan police constable lakna tur exam buatsaih a ni a, mi nuai 48-in exam hi an hmachhawn a ni. Police constable exam zawhna hi a put ru nia hriat a ni a, hei vang hian exam hmachhawn mi eng emaw zat chuan exam neih ṭhat phutin nawrh an lo huaihawt tawh bawk. UP sorkar hian February 24 khan exam neih tawh chu cancel a nih thu puangin, thla ruk chhunga exam buatsaih ṭhat a nih leh tur thu leh, zawhna put ru chungchang zir chiang tur hian Special Task Force (STF) din a nih thu an puang zui bawk a ni.

Hna lak exam buatsaihtu, UP police recruitment board chairperson, Renuka Mishra hi IPS officer, Rajeev Krishna chuan a thlak dawn a ni. Hemi chungchangah hian Uttar Pradesh chief minister, Yogi Adityanath chuan exam thianghlimna tibawrhbang thei reng reng chu palzam a nih loh tur thu leh, thil dik lo titu chu na taka hrem an nih tur thu a sawi tawh bawk.