Ladakh hruaitute'n state an phutna a hlawhchham thu sawi

Ladakh union territory-a pawl hrang hrang hruaitute chuan union home minister Amit Shah nena inbiakna an neih thu leh, sorkar laipui chuan an thil phutte a tihhlawhtlinsak theih loh tur an sawi.

Sorkar laipui leh Ladakh-a pawl hrang hrangte aiawha inbiakna kaihruaitu, Ladakh Buddhist Association (LBA) senior vice president, Chering Dorjay Lakruk chuan Ladakh aiawh mi parukte nen home minister Amit Shah Delhi-a an hmuh thu hi sawiin,"Ladakh-in kan phut leh beisei anga state nihna pek leh sixth schedule-a telh kan dilna chu tiam theih kan ni lo tiin Amit Shah chuan min hrilh a ni," tiin, inbiakna an neihte pawh a hlawhchham niin a tarlang. Lakruk hian sorkar laipuiin a sawm anga inbiakna hi neih a nih thu leh, inbiakna an neih vawi thumna a nih thu te a sawi tel bawk.

An inbiakna a hlawhchham thu tarlan a nih hnu hian Ladakh aiawha sorkar laipui dawrte hian Ladakh Apex body leh Kargil Democratic Alliance (KDA) hruaitute'n Ladakh mipuite râwna an ngaihdan lain, an thil phut chungchanga sorkar nawr chhunzawm zel dan tur chu an rel tur thu an sawi. Ladakh Apex body leh KDA te hian Ladakh tana state pek bakah, Sixth schedule-a Ladakh dah luh hi an phut a, hei hian tribal nihna a pek dawn bakah khawtual mite tan sorkar hna laâkah reservation siam a ni thei dawn a, tin, Leh leh Kargil tan parliament-a seat hauh an phut bawk a ni.