CSS-a thawkte'n promotion tihkhawtlai vangin nawrh an tum

Sorkar laipui hnuaia Central Secretariat Service (CSS)-a thawkte chuan Thawhṭanni khan union minister hrang hrangte office awmna, Raisina hills-ah pun khawm an huaihawt. CSS-a thawkte hian an hnaa an kaisanna tur chungchangah sorkar laipui chu che muang leh anmahni ngaihthah nia sawiin, promotion pek an nih loh avang hian pension leh an hlawh thlenga an nih tur ang an phak tawh loh thu leh, ngaihtuah an nih vat loh chuan nawrh an tum thu an sawi.

Sorkar laipui hian October 2022 khan Cadre Review Committee (CRC) a lo din tawh a, he committee hi CSS enkawltu ministry, Department of Personnel and Training (DoPT) hotute'n an kaihhruai a ni. Committee hian ministry hrang hrang hnuaia thawktu indaih lohna leh cadre siam rem bakah, promotion kal dan thlenga zir chianga ruahmanna siam tur an nih laiin, vawiin thlengin sorkar hnenah engmah an la thlen lo thung. Hemi chungchangah hian CSS-a thawkte hian committee-in report a la theh luh loh avanga heng harsatna hi thleng a nih thu leh, promotion a awm loh avanga thawktu thar lak theih lohna a thlen thu te, chu chuan hnathawh tur tam zelah thawktu indaih lohna a hrin thu leh, a thawk mekte pawh an mangan thu an sawi.

"CSS forum hian promotion chungchangah hian sorkar laipui hi kan lo dawr fo tawh a, sorkar laipui aṭang erawh engmah sawi a la awm lo a ni. Sorkar laipui hnathawh kawnga pawimawh em em, CSS officer-te ngaihthah an nih dan hi a zahthlak hle a ni" tiin, CSS forum hian Secretary hnena an lehkha thawnah an tarlang.

CSS forum hian ni eng emaw ti chhung chu nawrh huaihawt hi an tum thu an sawi a, sorkar laipuiin an promotion chungchang hi a ngaihtuah vat loh chuan non-cooperation movement kalpui an tum thu an tarlang bawk. Non-cooperation movement-ah hian office hour pangngai, zing dar 9 aṭang tlai dar 5 leh a chanve thleng chiah chiah hna an thawk dawn a ni. CSS-a thawkte hian office hour pela hna an thawh fo thu an tarlang bawk.