PM-in India rama tui hnuai paltlang metro hmasa ber hawng

Prime minister Narendra Modi chuan nimin khan India ram chhung hmun hrang hranga metro siam tharte a hawng a, metro thar hawn zingah hian Kolkata east-west metro corridor-a metro line siam thar, tui hnuai paltlang, Howrah Maidan - Esplanade a tel.

Howrah Maidan - Esplanade metro line hi Hoogly lui hnuaia kal niin, India rama tui hnuai paltlang metro hmasa ber a ni a, Rs. vbc. 4,965 senga siam a ni. He metro line hi India rama metro station thuk ber a ni bawk a, PM Modi hian hawnna hun a hman zawh hian Esplanade aṭanga Howrah Maidan thlengin metro-ah hian a chuang nghal a ni. Howrah Maidan - Esplanade metro line hi km 16.6-a thui a ni a, tui hnuaia kal chin hi metre 520-a thui niin, metro rel hian tui hnuai chin paltlang tur hian second 45 vel hun a mamawh a ni.

PM Modi hian Howrah Maidan - Esplanade metro hawnna a neih zawh hian New Garia-Airport line-a Kavi Subhash - Hemanta Mukhopadhyay siam chu a hawn bakah, India rama metro line upa ber Joka - Esplanade line-a Taratal - Majerhat chu a hawng bawk a ni. Delhi-Meerut RRTS Corridor-a Duhai-Modinagar section te, Pune Metro-a Ruby Hall Clini - Ramwadi te, Kochi metro-a SN Junction - Tripunithura leh Agra metro-a Taj East gate- Mankameshwar te chu a hawng tel bawk.

Bihar-ah vbc. 12,800 man project tlangzarh

Nimin vek khan Kolkata-a metro line hrang hrang hawnna hun a hman zawh hnuah, PM Modi hian helicopter-in Bihar a pan leh a, West Champaran district-a Battiah khuaah hun hmangin, hetah hian Rs. vbc. 12,800 chuang hnathawhna tur a tlangzarh.

Prime Minister-in Bihar-a hmasawnna hna thawh nana hman tur Rs. vbc. 12,800 man hu project a tlangzarhah hian Moihari leh Muzaffarpur inkara LPG line siamna tur te, Motihari-a Indian Oil LPG bottling leh storage plant dinna tur te a tel a ni.