IIHR-in National Horticulture Fair 2024 buatsaih

Indian Institute of Horticultural Research (IIHR) chuan Hessarghatta, Bengaluru-a Indian Council of Agricultural Research (ICAR) hmunhmaah ni thum awh tur, National Horticulture Fair (NHF) 2024 an buatsaih. Horticulture fair hi mi 18,000 aṭanga mi 20,000 velin an tlawh tawh niin an tarlang.

IIHR chuan horticulture fair-ah hian India-in tunlai hmanraw ṭha ber hmanga irrigation a kalpui dan te, environment tana pawi lo zawnga thlai thar a kalpui dan bakah, thlai thar tam zawk neih dan leh daih rei zawka horticulture kalpui dan te entirna neiin pholan a ni. Fair-ah hian sawngbawlna mumal lo pawha thei tharte rei zawka dah ṭhat theih dan inzirtirna neih a nih bakah, nipui laia tui tlem avanga harsatna an tawh ṭhin te tihtlem nana daih zai taka tui hmanna khawlte pho chhuah a ni bawk a ni. He fair hian horticulture huang chu industry anga kalpui satliah mai lo a, horticulture aṭanga thar chhuah thlai hrisel zawk neih a nih theihna tura inzirtir chu a tum ber a ni a, hei hian ṭhalaite horticulture lama tui tura a hip leh zual beisei a ni.

National Horticulture Fair 2024-ah hian IIHR hian an hmanrua leh khawl 238 chuang a taka entirna hun an hmang a, stall 250 hawn a ni bawk. State hrang hrang 20 aṭang leh, ICAR institute leh Krishi Vigyan Kendras (KVK) 50, sorkar hnuaia pawl hrang hrang, sorkar hnuaia awm ni lo pawl leh, Farmer Producer Organisations (FPO)-te chu he fair-ah hian an tel.