Rahul Gandhi-a'n Amethi aṭangin LS seat chuh dawn, BJP worker-te a kawm

Congress party president hlui, Rahul Gandhi chuan yatra chhunzawma Madhya Pradesh-a a awm mek laiin, Thawhlehni khan Amethi seat chuha kum 2024 Lok Sabha inthlan a hmachhawn tur thu Uttar Pradesh-a Congress hruaitute chuan an puang.

Delhi-a meeting-a kal, district Congress president, Pradeep Singhal chuan Rahul Gandhi chu Amethi aṭanga Congress party candidate tur a nih thu hi sawiin, official-a puan thuai a nih tur thu a tarlang bawk. Rahul Gandhi hi 2002 aṭang khan Amethi aṭanga Lok Sabha seat chuhin a lo ding tawh a, 2019 thleng khan Amethi aṭanga thlan tlin niin Lok Sabha MP hna hi a chelh a ni. Mahse, 2019 Lok Sabha inthlanah khan Amethi seat-ah hian BJP candidate Smriti Irani hneh loin, Kerala-a Wayanad MP niin Lok Sabha MP nihna hi a chelh chhunzawm thung.

Bharat Jodo Nyay Yatra huaihawta India ram khawpui hrang hrang tlawha kal kual mek, Rahul Gandhi hian Thawhlehni khan Madhya Pradesh hi a thleng a, Madhya Pradesh-a a awm lai hian, Ujjain-a Mahakaleshwar temple-ah ṭawngṭaina hun a hmang nghal bawk.

Ujjain a luh dawn hian BJP party worker eng emaw zat chuan an lo au el a, mahse, Rahul Gandhi hian Ujjain-ah hian a motor tidingin, heng BJP party worker-te hi chibaiin, inkawmna hun tawite a hmanpui thu a tarlang.

Rahul Gandhi-a farnu, Priyanka Gandhi Vadra pawh kumin Lok Sabha inthlanah hian a ṭum khatna atan Uttar Pradesh-a Raebareli bial aṭangin a chuh dawn nia sawi a ni bawk. Mahse hemi chungchang hi party lam aṭangin sawi chian a la ni lo.