Khelo India-a medal dawngte'n sorkar hna dil thei tawh dawn

Union sports minister, Anurag Thakur chuan inkaihhruaina thar an siamah, India rama Khelo India inelna hrang hranga tel, medal dawng chinte'n an duh chuan sorkar hna an dil theih tawh tur thu a sawi.

Anurag Thakur hian sports ministry leh department of personnel and training te'n inbiakna neiin, inremna ṭha tak an siam thu a sawi a, hei hi prime minister Narendra Modi hmathlir 'infiamna aṭanga kawng zau tak hawn' nen a inzul chiah a ni, a ti. PM Modi hian theihna neite chu an naupan lai aṭanga tuai hriam a ṭul thu leh, infiamna chu eizawn nana hman zui tlak anga ngaih a nih theih a duh thu a lo sawi tawh a ni.

"Khelo India games - Youth, University, Para leh Winter games thlengin, heng intihsiaknaa tela medal dawng chinte chuan sorkar hna an dil theihna atan hian hma thar kan la a ni. Infiamna chi hrang hrang huam kimtir a nih theih nan heng intihsiaknate hi chiang leh felfai taka ṭhen an ni bawk," tiin Thakur chuan X-ah a tarlang. Khelo India games hi Modi kaihhruai sorkarin India rama a bulṭhut aṭanga infiamna lama talent neite hai chhuah a nih theih nan kum 2018 aṭang khan a kalpui ṭan a ni.