Congress-in an sorkar chuan Citizenship Act ṭhiah an tum

Congress party hruaitu hlun, Pawan Khera chuan kumin Lok Sabha inthlana sorkarna an siam a nih chuan sawisel hlawh tak, Citizenship (Amendment) Act, 2019 chu an ṭhiah tur thu a sawi. Khera hian raltlan chungchanga rorel dan tur leh hmalak dan tur chu constitution mila siam a ṭul thu sawiin, BJP chuan CAA chu Assam-a hman luih an tum thu leh, Congress-in sorkarna an siam a nih erawh chuan CAA hi ṭhiah a nih tur thu a sawi a ni.

Pawan Khera hian press conference neiin,"Citizenship Act chuan India rama lutte an luh kum pawm chin a siamah 2014 a hmang a, mahse, Assam erawh chuan 1971 chin an pawm thung a, hei hi Assam tan chuan tihdanglam thiang lo tluk a ni. Khua leh tui atana pawm chin siam tura an luh kum tihdanglam hi Assam tana an nunna chantute zah lohna a ni," tiin, Bangladesh aṭanga Assam lutte, India khua leh tui anga chhiar tura Assam Accord hmanga March 25, 1971 chin pawm a nih thu a tarlang a ni. Hetih lai hian CAA-ah chuan Bangladesh, Pakistan leh Afghanistan aṭanga Hindu, Jain, Kristian, Sikh, Buddhist leh Parsi sakhaw vuantute chu December 31, 2014 emaw a hma lam emawa India ramah an lo luh a, kum nga tal an awm tawh a nih chuan India khua leh tui anga pawm an ni dawn thung.

Union home minister, Amit Shah chuan thla hmasa khan CAA hman dan tur chungchangah hian inkaihhruaina dan siam mek a nih thu leh, Lok Sabha inthlan neih a nih hmaa hman ṭan a nih tur thu te a lo sawi tawh a ni.