President-in Sangeet Natak Akademi award sem

President Droupadi Murmu chuan Nilaini khan 2022 leh 2023 atana performing arts hrang hrang; zai, lam, drama, hnam ziarang pho chhuahna kawng che ṭha artist-te chawimawina, Sangeet Natak Akademi award a sem.

Sangeet Natak Akademi award hi mi 44 hnenah hlan niin, zai lama thawh hlawk artist 12 hnenah hlan a ni. Mi 12 hnenah lam lama an thawh hlawk avangin hlan an ni ve bawk. Drama huangah hian mi pakua hnenah award hi hlan a ni a, hnam ziarang pho chhuahna kawnga thawh hlawk, mi 11 hnenah President hian award hi a hlan bawk a ni. Sangeet Natak Akademi hi 1952 aṭang khan sem ṭan tawh niin, he award hian sum fai cheng nuai 1 a keng tel bawk a ni.

Award sem chhuah a nih bakah hian Sangeet Natak Akademi fellowship, 'Akademi Ratna' an tih bawk chu President hian mi paruk hnenah a hlan a, he chawimawina hi artist, anmahni thiamna zawna hna ropui tak thawkte hnenah hlan ṭhin niin, mi 40 aia tam an awm ngai lo a, awm phal a ni lo bawk. Akademi Fellow-a tel thei tura Akademi Ratna hlante hian a sum faiin cheng nuai 3 an dawng ve bawk a ni.