Article 370 ṭhiah hnua a vawi khat nan PM-in Srinagar tlawh

Prime minister Narendra Modi chuan nimin khan Srinagar tlawhin, rally buatsaih a ni a, hei hi kum 2019-a Jammu & Kashmir state tan bika siam, India danpuia article 370 ṭhiat a, J&K state ni ṭhin UT pahniha ṭhen hran a nih hnua a tlawh lehna hmasa ber a ni.

Prime Minister Modi hian Srinagar-a Bakshi stadium-ah hun hmangin, BJP chuan rally-ah hian mi nuai hnih chuang an tel niin an tarlang. PM-in Srinagar a tlawh pual hian rally tel turin district hrang hrang aṭangin an kal khawm a, pung khawmte ei tur leh awmna tur pawh ruahmanna siam niin, sorkar hnathawkte pawh he huna an tel theih nan hian ruahmanna siam a ni bawk. Srinagar-a sikul eng emaw zat chu nimin khan khar a ni a, Kashmir university pawhin nimina exam awm zawng zawng a sawn hlat phah bawk.

Rally hi district hrang hrangah big screen hmanga live-a pek chhuah a ni a, he hunah hian PM Modi hian tourism leh agriculture kaihhnawih project a tlangzarh bakah Hazratbal Shrine thuam ṭhat nan hnathawh tur pawh a hawng nghal a ni.