CCPA-in pawisa inthapna chawi lar lo tura milarte hriattirna tichhuak

Sorkar laipui hnuaia Central Consumer Protection Authority (CCPA) chuan Nilaini khan thu chhuah siamin, dan phal loha pawisa inchawina leh inthapna ang chi chawi lar kawnga fakna siam ṭhin te, social media platform te, product vawrh lar ṭhin te, TV lama mipui hmuh theiha inlan ṭhin te leh milar te fimkhur turin a chah.

CCPA chairman leh union secretary of consumer affairs ni bawk, Rohit Kumar Singh chuan thuchhuah an siamah hian heng dan phal loha inthapna leh pawisa inchawina siama buatsaih ṭhinte hian an thil siam theh darh nan milarte an chhawr ṭhin tih sorkar laipuiin a hriat thu a tarlang a ni. "Milarte'n heng inthapna an faksak hian dan phal loha thil tihte chu ngaihhnathiamna a awm nia ngaihna a hrin phah a ni" tiin, union minister chuan Cable Television Network (Amendment) rules, Information Technology Guidelines leh Digital Media (Intermediary Ethics Code) rules-in a huamte bakah online-a advertisement kalpui ṭhin te, Advertising Standards Council of India leh print leh electronic media kaihhnawih pawl hrang hrangte tan hriattirna thuchhuah hi siam a nih thu a tarlang.

Rohit Kumar Singh hian Ministry-in 2022-a mi bum thei zawnga fakna siam chungchanga inkaihhruaina a chhuah bawhchhiate chu consumer protection act hnuaiah na taka hrem an nih tur thu a sawi bawk. Kum 2022-a ‘Prevention of Misleading Advertisements and Endorsements for Misleading Advertisements’ hmanga inkaihhruaina siamah hian danin thil siam chhuah, zawrh leh hman a phal loh thil chi hrang hrang chawi larna atana fakna siam chu khap a ni a, hei hian dan loa pawisa inthapna leh inchawina hi huamin, eng hmang maha faksak emaw, chawi lar a thiang lo a ni.