LPG cylinder man Rs 100-a tihhniam a ni ang : PM Modi

Prime minister Narendra Modi chuan nimina International Women's Day hman pualin ei rawngbawlna gas man chu Rs. 100-a tihhniam a nih tur thu a puang. Prime Minister hian ei rawngbawlna gas man tihhniam hian India rama chhungkaw nuai tam tak tan an phurrit a chhawk theih tur thu a sawi.

PM Modi chuan,"Ei rawngbawlna gas man tihhniam hian chhungkaw tinte tana ṭha tur leh, khawsak nawmna kan ngaihtuah tih a lantir a ni. Hei hi hmeichhiate dinhmun chawi kang a, an tana nun nawmna siam tura ke kan penna kawnga kan inpekna a tarlang bawk," tiin X-ah a post. Ei rawngbawlna gas man tihhniam a nih avang hian India ram khawpui, Delhi-ah LPG cylinder man, Rs. 903 ni ṭhin chu Rs. 803 a ni tawh a, Mumbai, Kolkata leh Chennai-ah pawh Rs. 902.5, Rs. 929 leh Rs. 918.5 ni ṭhin chu Rs. 802.5, Rs. 829 leh Rs. 818.5 ah an tla hniam bawk.

Hetih lai vek hian sorkar laipui hian Ningani khan Ujjwala Yojana scheme hnuaia hmeichhe retheite tana hamṭhatna, ei rawngbawlna gas mana Rs. 300 subsidy pek chu chhunzawm a nih tur thu an puang bawk. Sorkar laipui hian Ujjwala Yojana scheme hnuaia inziak lutte tan, nikum October thla khan LPG cylinder pakhat atana subsidy a pek hi Rs. 200 aṭangin Rs. 300-ah a tisang a, hei hi March 31 hian a tawp tawh dawn a ni.