Congress-in Mahila Nyay yatra neih tur puang

All India Mahila Congress chuan International Women's Day pualin, nimin khan India ram pum huapa Mahila Nyay Yatra an neih tur thu an puang. Yatra neih tur hi pawngsual tawk hmeichhia leh an chhungte tana zahna leh hrehawmna an tawrh ṭawmpuina leh lantirna tur a nih thu an tarlang.

Mahila Congress hruaitu, Alka Lamba chuan nimin khan Delhi-a Congress headquarters-ah press mite kawmin, Mahila Nyay yatra neih a nih tur thu hi a puang a, he hunah hian India president, Droupadi Murma leh prime minister Narendra Modi te chu India ram pawngsual tawk hmeichhia leh an chhungte tana rorelna dik pek kawnga hmanhmawh turin a ngen a ni. Lamba hian hmanni maia Uttar Pradesh-a pawngsual tawk hmeichhe pahnihte'n rorelna dik an hmuh loh avanga an intihhlum tak thu sawi chhuakin, hemi chungchanga Women and Child Development Minister leh National Commission for Women Chairperson te an ngawi tlat chu a hriatthiam loh thu a sawi bawk.