Sorkar laipuiin jute MSP tisang

Cabinet Committee on Economic Affairs chuan sorkar laipuiin loneitute jute thar chhuah an leisakna tur Minimum Support Price (MSP) chu tihsan a nih thu an sawi.

Union commerce minister, Piyush Goyal chuan thu thar thehdarhtute hnenah he thu hi sawiin,"Kum 2024-2025 chhunga sorkar laipuiin loneitute hnen aṭanga jute a leisakna tur chu Rs. 285-a tihpun a ni a, jute hi quintal khat zelah Rs. 5,335 -in lei a ni tawh ang," tiin a tarlang. Goyal chuan jute tan bika MSP tihsan hian India ram puma jute thartute bakah, a sawngbawlna kawnga inhnamhnawihte'n a hlawkna 64.8% an hmuh let theih phah beisei a nih thu a sawi bawk. "Kum 10 kal ta chhung khan sorkar laipui hian jute tana MSP hi 2014-2015 chhunga quintal khatah Rs. 2,400 ni ṭhin chu 2024-2025-ah chuan quintal khat Rs. 5,335 ni turin a tisang hman a, a punna hi 122% zet a ni" tiin, commerce minister chuan West Bengal, Bihar leh Assam-a jute chingtute a ṭanpui ngei a rin thu a sawi bawk.

"Jute leina man chungchangah hian Jute Corporation of India (JCI) chu palai hna thawktu leh, hlep tur hloh a awm a nih pawha mawhphurtu tur an ni ang. Hlep tur hlohte hi sorkar laipui chuan a vaiin a pe leh thung dawn a ni. Jute hralhna man hi MSP aia a tlahniam a nih chuan JCI hian a sawngbawlna an kalpui vek ang," a ti.