Sorkar laipui hnuaia thawk leh pension-te DA 4%-a tihpunna tur pawm

Union cabinet, March 7, Ningania ṭhu khawm chuan sorkar laipui hnuaia thawkte Dearness Allowance (DA) leh pension tawhte Dearness Relief (DR) chu 4%-a tihpun a nih thu an puang.

DA/DR punna hi January 1, 2024 aṭanga chhiar ṭana pek tur a ni a, sorkar laipui chuan DA/DR hman lai mek chu basic pay aṭanga 46% a nih thu leh, 4%-a tihpun chuan thil man san zel laia sorkar hnathawk leh pension-te a chhawk zangkhai theih an beisei thu an tarlang. Allowance dang; house rent allowance, canteen allowance leh deputation allowance-te pawh a tahtawl zela tihpun a nih tur thu an tarlang bawk. DA leh DR tihpunna atan hian sorkar laipui chuan kum tin, Rs. vbc. 12,868.72 a sen belh a ngai dawn a, hei hian sorkar laipui hnuaia thawktu, mi nuai 49.18 leh pension tawh, mi nuai 67.95 te a huam dawn a ni.

Union commerce minister, Piyush Goyal chuan DA/DR tihpun hi Central Pay Commission-in seventh pay atana rawtna an theh luh dung zuia siam a nih thu a sawi a, financial year hman mekah DA punna pek belh tur hian sorkar laipuiin Rs. vbc. 15,014 a sen a ngai dawn niin a sawi. Goyal hian transport allowance, canteen allowance, leh deputation allowance-te chu 25%-a tihpun a la nih tur thu a sawi lang bawk.