Sorkar laipuiin solar rooftop kalpui dan tur siam ṭha

Sorkar laipui chuan Rs. vbc. 75,000 ruahmana a siam, PM-Surya Ghar Muft Bijli Yojana (Prime Minister’s Rooftop Solar: Free Electricity Scheme) chungchanga inkaihhruaina leh hmalak dan tur siam ṭhat a nih thu an sawi.

PM-Surya Ghar Muft Bijli Yojana hnuaiah hian tlangzarh tirha ruahmanna siamah chuan India rama chhungkaw vaibelchhe khatte tan, mahni ina solar kilowatt (KW) 1-3 chin an install-na tur atan a thlawn veka tihsak tura tih a ni a, mahse, ruahmanna thar siamah hian solar install man aṭanga 60% chiah hi sorkarin a tum dawn niin tarlan a ni. He scheme hmanga hma la duh chhungkuate chuan anmahniin sum an sen ngai zat hi siam rem chawp zel a ngai dawn a, solar tha chakna an install zat a zira chhutin, a tlem berah Rs. 20,000 tal an chawi a ngai dawn a ni. Solar plate install tura mahni in chung neih a rem dan a zir leh, solar grid awm sa aṭanga an in awmna remchan dan a zira he scheme an dawn theih leh theih loh tur hi teha thlan tur a ni dawn bawk a ni.

Rooftop solar hi union finance minister, Nirmala Sitharaman chuan February 1-a budget a pharh khan sawi langin, rooftop solar hmang hian electric unit 300 a thlawna thla tin siam chhuah theih beisei a nih thu a sawi. Union power minister, RK Singh pawhin, February 3 khan, rooftop solar-te hi a thlawn veka sorkarin scheme hnuaia inziak lutte tana install tur thu hi a lo sawi tawh bawk.