Journalist-te him nana inkaihhruaina tur siam

Committee to Protect Journalists (CPJ) chuan 2024 Lok Sabha inthlan lo awm tura inthlan vuakveta che tur, journalist-te himna atana inkaihhruaina, ‘Safety Guide for Journalists covering Indian elections 2024' an siam.

CPJ-in inkaihhruaina an siamah hian thurâwn inpekna leh inkawhhmuhna lam dah a ni deuh ber a, chanchin thar lak khawm kawngah editor-te chu an hnuaia thawkte an tirh chhuah dana fimkhurna turte tarlan niin,hmeichhe journalist-te tihbuaina tur campagin awm ṭhin inven dan te, chanchinthar buatsaihna kawnga harsatna awm theia insiam rem te, India journalist-te harsatna hmachhawn ṭhin te tarlan a ni bawk. CPJ aiawh, Kunal Majumder chuan he hunah hian inthlan hun atana inbuatsaihna bakah rilru, taksa leh khawl thil mamawh thlenga inkaihhruaina kimchang dah a nih thu a sawi. Inthlan huna journalist-te him nana inkaihhruiana siam hi sap ṭawng tiam loin, ṭawng chi lia siam a ni.

Inkaihhruaina siamna huna tel, Hindu Group Publishing Private Limited director, N. Ram chuan Reporters Without Borders-in kum tina ram hrang hranga press mite zalenna an tehna an tihchhuah ṭhin chu tarlangin, kum 2014-a ram 180 chuanga press mite'n zalenna an neih leh khuahkhirh an tawh dan teh a nih aṭanga India chu 140-na a nih thu leh, hei hi 2023-ah chuan ram 180 zinga 163-naah a awm mek thu sawiin, hei hi journalist-te nunna leh dinhmun a derthawn sawtzia tarlangtu a ni tih a sawi bawk.