Loneitute'n rel kawng an dang

Sorkar laipuiin thlai thar a leisakna, Minimum Support Price (MSP) tana dan siam leh, an thil phut dangte ngaihtuahsak tura sorkar nawrna atan Delhi pana kawng zawh leh nawrh huaihawt mek, loneitu pawl hrang hrangte chuan nimin khan rel kawng an dang.

India rama loneitu pawl lian tak pahnih; Samyukta Kisan Morcha (Non-Political) leh Kisan Mazdoor Morcha (KMM) te chuan March 10, chawhnu dar 12 aṭanga tlai dar li thlenga rel kawng dan,'rail roko' an tih huaihawt an tum thu hi an lo sawi tawh a ni. SKM leh KMM hian kar hmasa khan state hrang hranga loneitute chu an thil phut chungchanga na zawka sorkar nawr nan, rel leh bus hmangtea Delhi pan khawm turin an lo ngen tawh bawk a ni. KMM hruaitu, Sarwan Singh Pandher chuan Punjab-a Ferozepur, Amristar, Rupnagar leh Gurdaspur district-ah te chuan rel kawnga ṭhuin, loneitute'n rel kawng an dan thu hi a sawi a ni.