PM kaihhruai panel-in EC thar ruat dawn

Prime minister Narendra Modi kaihhruai, union minister dang leh Lok Sabha-a Congress leader, Adhir Ranjan Chowdhury telna panel chuan March 15 ral hmaa Election Commissioner (EC) thar pahnih ruat an nih tur thu an puang. EC thar ruat tur hian March 14-ah an ṭhu khawm dawn a ni.

Election Commissioner (EC) ni lai, Arun Goel chuan Inrinni liam ta khan banna theh lutin, President Droupadi Murmu chuan hemi ni vek hian a pawmsak nghal a ni. Election Commissioner pakhat, Anup Chandra Pandey chu February 14, 2024-a a term a tawp tawh bawk avangin Election Commissioner thar pahnih ruat hi a ngai ta a ni. Anup Chandra Pandey-a term a tawp avang hian a hmun luah tur EC thar ruat turin March 15-ah Prime Minister kaihhruai panel hi ṭhut khawm tura ruahman a ni a, hetih lai hian Inrinnia Arun Goel a ban tak avang leh, Lok Sabha inthlan hun tur puan a hnaih tawh bawk si avangin EC thar ruat tur panel hian ṭhut khawm hun tur an sawn hma a ni.

PM kaihhruai panel-in EC thar an ruat hma hian union law minister, Arjun Ram Meghwal kaihhruai search committee chuan mi panga thlangin rawtna an siam phawt dawn a, search committee-ah hian union home secretary leh Department of Personnel and Training (DoPT) secretary-te an tel bawk. EC thar ruat hi nikuma parliament winter session-a hemi kaihhnawiha bill pass tak, 'Chief Election Commissioner and Other Election Commissioners (Appointment, Conditions of Service and Term of Office) Act, 2023'-in a tarlan anga ruat an ni ang.

Election Commission of India (ECI)-ah hian member pathum awmin, Chief Election Commissioner (CEC) pakhat leh member pahnih, Election Commissioner (EC) pahnih an awm a, CEC ni lai hi Rajiv Kumar niin, EC pahnihte hi Arun Goel leh Anup Chandra Pandey te an ni. Anup Chandra Pandey hi February 14, 2024 khan a term tawpin EC post pakhat hnawhkhah ngaiin a awm mek a, hetih lai hian Arun Goel-a term hi 2027-a tawp tur ni mah se, Inrinni khan banna a theh luh tak si avangin EC post pahnih ruak hnawhkhah a ngai ta a ni. Arun Goel ban chhan hi hriat a ni lo a, report ṭhenkhatah chuan CEC Rajiv Kumar nen an inkar boruak ṭhat loh vang nia tarlan a ni.