Himachal Pradesh : Congress MLA hel leh a pa lakah thubuai theh lut

Himachal Pradesh police-te chuan Pathianni khan Congress MLA hel paruk leh MLA pakhat pa lakah thubuai ziak lutin, hei hi Rajya Sabha MP inthlan kaihhnawiha party dang candidate vote chungchanga buaina kal zel a ni. Independent MLA pakhat lakah thubuai hi theh lut a ni bawk.

Thubuai theh luttu hi Congress MLA, Sanjay Avasthi leh Bhuvneshwar Gaur te an ni a, Congress MLA hel paruk, independent MLA leh Garget-te lakah hian inphiarrukna, eiruknaa inhnamhnawih, leh inthlannaa dik lo taka midang hmin tum angin an lakah hian thubuai theh luh a nih thu police-te chuan an tarlang. Hetih lai hian Chetanya Sharma pa, Garget laka thubuai theh luh a nih ve chhan hi an sawi lang lo thung. Thubuai theh luttu, Avasthi leh Gaur te hian heng MLA-te hi inthamna, helicopter leh sipai hman dik loh bakah inphiarrukna thilah an inhnamhnawih ngei thu sawiin, BJP chuan heng MLA-te hi hel turin an pui tih finfiahna ṭha tak an neih thu an sawi bawk a, hei vang hian chhui chian ngei an phut thu an tarlang.

Police-in thubuai an ziah luhna independent MLA hi Ashish Sharma a ni a, Congress MLA Chetanya Sharma pa, Gagret leh Congress MLA hel paruk; Sudhir Sharma, Ravi Thakur, Mr. Rana, Inder Dutt Lakhanpal, Chetanya Sharma leh Devinder Kumar Bhutto te lakah thubuai hi an ziak lut a ni. Heng MLA-te hi state assembly-a Rajya Sabha MP tur thlannaa party candidate vote loa, BJP candidate, Harsh Mahajan an vote avangin anti-defection law hmangin assembly speaker hian house aṭangin a disqualify a ni.

Himachal Pradesh assembly-ah hian February 27 khan Rajya Sabha MP tur thlanna neih niin, he inthlanah hian Congress MLA paruk leh Congress sorkar thlawptu, independent MLA pathumte chuan BJP candidate tan vote thlakin, hei vang hian Himachal Pradesh-a Congress sorkar chuan majority nei tawh loa tla maithei dinhmunah a ding a, Congress MLA parukte hi assembly speaker, Kuldeep Singh Pathania chuan February 29 khan a lo disqualify tawh a ni. Hetih lai hian MLA disqualify-te hian speaker-in a disqualify-na hi khingin, court-ah petition an theh lut ve leh a, petition an theh luhah hian rorelna dik a awm loh thu leh, disqualify an nihna chhang let tura hun pek an nih loh thu an tarlang. Congress MLA disqualify-te petition hi Supreme Court chuan vawiin hian a ngaihtuah dawn niin tarlan a ni bawk.