PM-in Chhattisgarh tan Mahtari Vandana Yojana scheme a tlangzarh

Chhattisgarh-a hmeichhe pasal nei tawhte tana sum leh paia ṭanpuina pekna tur, Mahtari Vandana Yojana scheme chu prime minister Narendra Modi chuan Pathianni khan a tlangzarh.

PM Modi chuan Mahtari Vandana Yojana scheme chu nikuma Chhattisgarh assembly inthlan neiha BJP-in inthlan thutiam an neih zinga mi a nih thu sawiin, he scheme hnuaiah hian Chhattisgarh-a hmeichhe pasal nei tawh, scheme dawng thei tura thlante hnenah thla tin Rs. 1,000 pek ṭhin a nih tur thu a sawi a ni. "Tun dinhmunah he scheme dawng thei hi mi nuai 70 awm tawhin, Rs. vbc. 655 chu sem chhuah turin sorkar laipuiin a pe chhuak tawh bawk," tiin, PM chuan BJP chauh chu inthlan thutiam tihlawhtling ṭhin an nih thu a sawi bawk.

Mahtari Vandana Yojana scheme kaltlanga pawisa dawng thei turte hi Raipur-ah kal khawmin, PM Modi hian kal khawmte hmaah Varanasi aṭangin video conference hmangin thu a sawi a,"Kan sorkarah chuan chhungkaw tinin hlim leh hrisel taka nung thei tura an mamawhte kan ngai pawimawh a, hei hi hmeichhiate hriselna leh zahawmna aṭangin a inṭan a ni. Sorkarna kan siam chhungin self help group kaltlangin India rama hmeichhia vbc. 10 chuangin hamṭhatna hrang hrang an dawng tawh bawk," tiin a sawi.