Kashmir buainaah mi 3 thi, Handwara-ah curfew puang

Jammu and Kashmir-a Kupwara district-a security force leh mipuite inkarah buaina chhuakin, sipaite silai hmehpuahah mi pathum an thi. Buaina chhuahna hmun Handwara khuaah curfew puan a ni nghal bawk.

Handwara khuaa hmeichhe tleirawl pakhat chu sipai pakhatin mipat hmeichhiatna lam hawiin mawi lo takin a khawih nia sawi a nih vangin buaina hi a chhuak a ni. Khawchhung mipui thinrim chuan sipaite hi beiin lungin an tawng a, sipaite hian mipui hnawhdarh nan hian silai an hmetpuak ta nia sawi a ni.

Jammu and Kashmir Chief Minister Mehbooba Mufti-i chuan nimin khan Delhi-a Defence Minister Manohar Parrikar a hmu a, Handwara khuaa civil mi thah an nih chungchang hi a sawipui. Parrikar chuan he thil thleng hi chhui chian a ni tur thu leh, pawikhawihtute chu hrem ngei an nih tur thu a lo hrilh.

Hetihlai hian police-te chuan an chhui chiannaah Handwara-a sipaiten hmeichhe tleirawl an khawih nia sawi chungchang hi a dik lo niin an sawi a, misual ṭhenkhatin buaina siam tumin thu dik lo an thehdarh mai a ni, an ti. Army pawhin thil awmdan chhui
chiang tur hian thupek a ti≠chhuak tawh bawk.

J&K CM Mufti-i chuan Union Home Minister Rajnath Sing pawh hmuin, tunhnuaia zirlaite inkara buaina chhuahna, National Institute of Technology (NIT), Srinagar chungchang an sawidun a, zirlai ṭhenkhatin college sawn tura an phutna chu thil theih a nih loh thu a sawi. Union Minister hian CM hnenah hian college boruak muanawm leh zirlaite himna siamsak turin a lo ngen a ni.