Pakistan hnena fighter jet hralh tum vangin India lawm lo

US-in Pakistan hnenah fighter jet F-16 hralh a tum avangin India a lawm lo hle a, heng fighter jet-te hi firfiakte laka beihpui thlakna tur niin sawi mah se a pawm lo tih a sawi.

Defence Minister Manohar Parrikar chuan F-16 aircraft hralh tum chungchanga an lawm loh thu hi India tlawha rawn zin, US Defence Secretary Ashton Carter pawh a sawipui a ni.

New Delhi-a Parrikar nen joint press conference an neihah Carter chuan, "Pakistan tana kan thiltih hi firfiakte beih letna tur atan zela ti kan ni. He ram aṭanga firfiakte chetna thleng ṭhin tuartu kan ni ve bawk a ni" tiin, US chuan India leh Pakistan chu ang khata a en loh thu a sawi. India nena inlaichinna ṭha tak neih an duh thu sawiin, Carter chuan US chuan India hnena technology dangdai tak tak a pek ang inremna chu ramdangte pawh an siampui ve lo tih a sawi bawk.