Delhi-ah odd-even scheme hmang leh dawn

Delhi sorkar chuan April 15 hian a thawh hnihna atan khawpui chhunga motor number kawp≠kim leh kawpkim lo intlan≠chhawk, odd-even scheme chu a hmang leh dawn.

Delhi Chief Minister Arvind Kejriwal chuan niin khan odd-even scheme programme chungchang hi sawiin, hlawhtling taka an lo kalpui tawh avangin Delhi mipuite chungah lawmthu a sawi.

Delhi CM chuan kum≠in kumtira ni 15 chhung odd-even scheme hman khan Fortune Magazine-in a tarlan danin khawpui boruak bawlhhlawh chu 13% zetin a tlahniam a ni, a ti. Scheme hman chhung hian khawpui chhunga diesel leh petrol hralh chhuah pawh 40% zet a tlakhniam thu a sawi bawk.

A thawh hnihna atana scheme an kalpuina turah hian mipui veivahna lama harsatna a awm lohna turin sorkarin bus tam zawk tlantir a tum thu CM chuan a sawi, luxury bus-te pawh tlan tir an tum a ni.

April 15 aṭanga odd-even scheme phase-II hmanna tur atana hriattirna hi Delhi sorkar chuan Thawhṭanin khan a lo tichhuak tawh a ni. A thawh hnihnaah hian hmeichhiate leh school naupang hruaitu car-te chu ngaihnathiam an ni ang.

Delhi CM hian Maharashtra state-a khawkheng vanga tui lama harsatna nasa tak tawk mek, Latur khaw mite tana tui pek a nih theihna atan Delhi mipuite chu tui renchem turin a ngen a, thla hnih chhung chu nitin Delhi aṭang hian Latur khaw tan tui liter nuai 10 thawn ziah a duh thu leh, hemi atan hian sorkar laipui chu pui tura sawmin Prime Minister Narendra Modi hnenah lehkha pawh a lo thawn tawh a ni. Mahse hei hi BJP chuan na takin a sawi≠sel a, Delhi Assembly-a eptu hruaitu, BJP MLA Vijender Gupta chuan Latur-a tui thawn chu thil tih chi a ni lo, a ti.

Gupta chuan CM Kejriwal-a PM hnena ngenna a thlen chu politics lama hlawkpuina hmuh a tumna vang niin a puh a, hmun hla lutuka special train hmanga tui thawn chu thiltih chi a ni loh thu a sawi. Gupta chuan Delhi khawpui chhunga cheng hmun thuma ṭhena hmun khat chuan tui supply pawh an dawng lo a ni tiin, khawpui chhunga tui harsatna chu ngaih pawimawh leh si loah AAP sorkar chu a puh.