Vijay Mallya case : CBI-in ram 5 hnenah ngenna thawn dawn

Central Bureau of Investigation (CBI) chuan ram panga - UK, US, France, HongKong leh Switzerland hnenah Kingfisher Airlines neitu, Vijay Mallya-an a mimal hming leh airlines hminga sum a thawnkual dan kimchang hriattir tura ngenna, Letters Rogatory (LR) a thawn dawn.

Vijay Mallya hian sum lama harsatna a neih avangin Kingfisher Airlines hi a titawp tawh a ni. He airlines hminga IDBI aṭanga loan a puk, cheng vaibelchhe 950 chu Axis Bank-ah sawnkualin, a sum puk tam zawk chu rampawn lama in luahna man pekna atan leh aircraft parts leina atan a hmang niin CBI chuan a sawi.

Inspector Varsha Verma chuan, Mallya-a sum pukte hi rampawn lamah thawn chhuah a nih avangin chhui chiang tur chuan LR hi thawn ngai niin a sawi.

Bank hrang hrang hnenah leiba, cheng vaibelchhe 9000 vel nei mek, Vijay Mallya hi rampawn lamah a awm mek a, a leibate a tahtawl≠a rulhna tura rawtna a siam≠te chu bank lam hian an hnawl≠sak. Hei vang hian Supreme Court chuan Mallya hnenah hian March 31 khan hriattirna pein, April 21 hma ngei amah leh a nupui leh fate hminga thil neih zawng zawngte tarlanna thehlut turin a hriattir.