CAA hman chungchangah state sorkarin thuneihna a nei lo : Sorkar laipui

Sorkar laipui official-te chuan khua leh tui (citizenship) nihna chu constitution-in sorkar laipui khawih leh thuneihna hnuaia a dah angin state sorkarin an duh thua an hman loh theih a nih loh thu an sawi.

Citizenship Amendment Act (CAA) hman theih tura sorkar laipuiin dan a zam fel thu leh hman ṭan nghal tur a nih thu a puan hnuah Tamil Nadu chief minister, MK Stalin chuan CAA chu an state-ah hman ve a nih loh tur thu a sawi a, hemi hnu hian sorkar laipui chuan state sorkarin sawi theih an neih loh thuin a chhang a ni. "Dilna hi online-a kalpui tur a nih avangin state sorkar tan lo inrawlh theih a ni lo", tiin sorkar laipui official pakhat chuan a tarlang.

CAA kaltlanga India khua leh tui nihna dilna hi sorkar laipui hnuaia postal leh census department-te buaipui tura dah a ni a, dilna leh diltute zir chianga, finfiah ngai apiang finfiah turin sorkar laipui security agency-te ruat an ni bawk a ni. Khua leh tui nihna dil chungchanga thutawp siam theitu chu state tina census operation director kaihhruai, empowered committee a ni. Official-te chuan CAA hmanga India khua leh tui nihna dilna tura portal siam, https://indiancitizenshiponlin... -a registration ti tawh eng emaw zat an awm tawh thu sawiin, in-register man hi Rs. 50 a ni.

India rama Muslim-te khua leh tui nihna a nghawng dawn lo : MHA

Union Ministry of Home Affairs (MHA)-in CAA hman a nih tur thu leh CAA hnuaia dan hman tur a zamte a puan hnuah MHA hian thuchhuah siamin, CAA chuan India rama Muslim cheng mekte khua leh tui nihna a nghawng loh tur thu an tarlang.

MHA hian an thuchhuahah,"India rama Muslim-te tan chiaina tur a awm lo, CAA hi khua leh tui an nihna nghawng leh khawih buai thei dan a ni lo a, India rama Muslim vbc. 18-te nen inzawmna a nei lo. Hindu-te ang bawkin zalenna leh chanvo an nei a, India khua leh tui ni sate chu CAA avang hian khua leh tui an nihna finfiah tura tih an ni dawn lo," tiin a sawi. MHA chuan CAA-in dan loa India rama lo lutte thawn kir chungchang a khawih loh thu sawi bawkin, Muslim leh zirlai ṭhenkhat hlauh angin CAA chuan an tan nghawng a neih loh thu an sawi bawk a ni.

CAA hmang hian Pakistan, Bangladesh leh Afghanistan-a Hindu, Sikh, Buddhist, Parsi, Jain leh Kristian sakhaw zuitute, an sakhaw vawn avanga tihduhdah tuar, December 31, 2014 hmaa India rama lo tlanchhia leh kum khat aia tam awm tawhte chu khua leh tui nihna pek theih an ni dawn a, he dan hian Muslim-te a huam tel loh avangin India rama Muslim-te chuan CAA hi thliar bik nei leh khua leh tui ni sate tana hlauhawma ngaiin an dodal a ni. Hetih lai hian MHA chuan CAA-in Muslim tana India khua leh tui nihna a dal loh thu leh, khawvel khawi hmun aṭang pawha Muslim, India khua leh tui ni duhte chuan constitution-in a tarlang angin, citizenship act hnuaia section 6 hmangin an dil theih reng thu an sawi a ni.

Muslim pawl hrang hrangin CAA duh lohna lantir

India rama Muslim pawl hrang hrangte chuan sorkar laipuiin CAA hman tur thu a puan hnuah thuchhuah inṭawm siamin, sorkar laipui hmalakna chu an dem thu leh, ram inpumkhatna dâl thei dan chu an do tlat tur thu an tarlang.

CAA dodalna lantirnaa tel Muslim pawl hrang hrang zingah hian Jamaat-e-Islami Hind, Jamiat Ulama-i-Hind, Jamiat Ahl-e-Hadith, Milli Council leh Imarat-e-Shariah te telin, an thuchhuahah chuan,"He dan hian India constitution-in rorelna dik, intluktlanna leh mahni sakhaw zalenna a pekte a hnualsuat a ni. Article 14-ah chuan dan hmaah mi tu mah an sakhaw vawn avanga thliar tur a nih loh thu leh, dan hmaah chuan kan intluk vek thu tarlan a ni," tiin, CAA chuan sakhaw behchhanin khua leh tui nihna a pek thu an tarlang a ni.

Heng Muslim pawl hrang hrang aiawh thuchhuah inṭawma hming ziaktute hian CAA chuan Muslim-te chu tihluihnaa a hmaih thu leh hman ṭan tura puan zar a nih hun chuan politics-a tute emaw hlawkna tur leh mipui ṭhen darh tumna a hawia an hriat thu sawiin, sorkar laipui chu CAA, 2019 ṭhiat leh tura an duh thu an sawi.