Ramlila ground-a pung khawm turin loneitute'n Delhi police phalna an hmu

Minimum Support Price (MSP) chungchanga dan siam leh thil dang an phut avanga loneitu nuar mekte chuan March 14-a an thil phut chungchanga Delhi, Ramlila ground-a pung khawm turin Delhi police-te'n phalna an pek tawh thu an sawi.

Loneitute nawrh huaihawta a bultumtu zinga mi, Samyukt Kisan Morcha (SKM) chuan March 14-a 'Kisan Mazdoor Mahapanchayat' huaihawt an tum thu hi lo sawi tawhin, he hunah hian prime minister Narendra Modi kaihhruai sorkar laka an thil phutte na zawka nawr nan resolution pass an tum thu an sawi a ni. SKM hruaitute chuan 'Kisan Mazdoor Mahapanchayat' atan hian Delhi-a Ramlila ground-ah India rama loneitu zawng zawngte koh khawm an nih thu sawiin, pun khawm phalna pawh Delhi police-te'n an pek tawh thu an tarlang a ni. "Delhi police-te chuan March 14-a Ramlila Maidan-a kan hun hman tur atan, No Objection Certificate (NOC) an chhuah tawh a, Delhi Municipal Administration-te chuan motor dahna tur, tui mamawh tur leh inthiarna tur bakah ambulance thlengin min ngaihtuahsak dawn bawk a ni," tiin an thuchhuahah an tarlang.

'Kisan Mazdoor Mahapanchayat'-ah hian an thil nawr mek chungchanga nasa zawka sorkar nawr dan tur leh, an kalpui zel dan tur chungchanga ruahmanna 'Sankalp Patra' resolution pawm a ni ang. Mahapanchayat zawm tur hian state ṭhenawma loneitute kal khawm an tum bakah India ram hmun hrang hranga loneitu eng emaw zat chuan bus leh rel hmangin Delhi hi an pan bawk a ni. Mahapanchayat-ah hian loneitute bakah Central Trade Union joint platform aiawh, trade union dang aiawh an tel dawn a, eizawnna danga pawl hrang hrang aiawh tel tur an awm bawk a ni.