India ramah hri kai dam leh nuai 28 chuang tawh

India ramah ni eng emaw zat chhung ni khata hri kai sing sarih chuang an awm hnuah nimin khan sing sarih an tling lo a, mahse a la hnaih hle thung. Ni khata hri kai hmuh chhuah hi an tam thei hle a, sing riat dawn hmuh chhuah thar an awm changte pawh awm mah se nimin khan tlahniam hretin mi 69,921 hmuh chhuah thar an awm.

Ramchhung hmun hrang hrangah nimin thleng khan hri kai hmuh chhuah mi 36,91,166 an awm tawh a, heng zinga mi 28,39,882 lai hi chu an dam leh tawh thung. Nimina Ministry of Health and Family Welfare report aṭanga a lan dan chuan darkar 24 chhungin hri kai dama puan mi 65,081 an awm tawh a ni.

MoHFW report chuan ni khatah mi 819 an thi leh tih tarlangin India ramah Covid-19 vanga thi mi 65,288 an awm tawh a, tunah hian mi 7,85,996-in hri an la kai mek bawk.

Enkawl dam tawh rate hi 76.94% a ni tawh a, nitinin enkawl dam rate hi tlem tlemin a pung reng a ni. Thihpui rate pawh tlahniam hret hret reng a, nimin kha chuan 1.77%-ah a tlahniam tawh a ni.

ICMR hi ni khatah

sample an endik tam

Indian Council of Medical Research (ICMR) chuan nimina report an tihchhuahah darkar 24 chhungin Covid-19 sample 10,16,920 an endik a, nimin thleng khan sample 4,33,24,834 an endik tawh a ni.

ICMR hian sample endikna tura laboratory pawmpui 1596 an nei tawh a, heng zinga 1006 hi sorkar laboratory niin, 590 chu private laboratory a ni thung.