Election Commissioner thar pahnih ruat

Prime minister Narendra Modi kaihhruai panel chuan Election Commissioner (EC) hmun ruak pahnih hnawh khah nan, IAS hlui pahnih; Sukhbir Singh Sandhu leh Gyanesh Kumar a ruat thu Adhir Ranjan Chowdhury chuan a tarlang. Chowdhury hian nimina EC ruat tura panel ṭhut khawmna neih a nih zawhin EC ruat tharte hming hi press mite hmaah a puang.

EC tharte hi Chief Election Commissioner and Other Election Commissioners (Appointment, Conditions of Service and Term of Office) Act, 2023 hmangin prime minister Narendra Modi kaihhruai panel chuan nimin khan an ruat a ni. Panel-ah hian union minister ṭhenkhat leh Lok Sabha-a Congress leader, Adhir Ranjan Chowdhury te an tel. EC thar atana Sukhbir Singh Sandhu leh Gyanesh Kumar te ruat an nih hma hian union law minister kaihhruai, search committee chuan hming 200 chuang EC atan hian rawtna a theh lut a, heta ṭang hian PM kaihhruai panel hian mi paruk an thlang chhuak leh a, mi paruk zing aṭang hian Election Commissioner tur hi ruat a ni.

EC ruat dan chungchangah hian nikuma parliament winter session-a pass tak Chief Election Commissioner and Other Election Commissioners Act, 2023-in EC ruattu committee aṭanga Chief Justice of India paih a, union minister pakhat dah zawk tura a tarlan angin kalpui a ni. Hetih lai mek hian Supreme Court hian panel-a CJI tel tura ngenna, petition theh luh chu a ngaihtuah dawn bawk.

EC- te hi India rama inthlan buatsaih ṭhintu leh thuneitu ber, member pathum awmna, Election Commission of India (ECI) chhunga mi an ni a, Chief Election Commissioner (CEC) pakhat hnuaiah, EC hi pahnih an awm a ni. EC thar pahnihte hi EC ni lai, Anup Chandra Pandey term February 14-a a tawp tawh avang leh, kar hmasaa Arun Goel banna theh luh avanga an hmun ruak hnawh khah nana ruat an ni.