Union Home Minister-in CAA hnuh kir a nih loh tur thu a sawi

Union home minister, Amit Shah chuan Citizenship Amendment Act (CAA) chu dodalna nasa tak awm mah se, hnuh kir a nih loh tur thu sawiin, BJP sorkar chuan an dinna an sawh sawn dawn lo, a ti.

Amit Shah chuan khua leh tui nihna pek theihna hi India-in mahnia ro a inrelna pawimawh tak a nih avangin kal tlangpui an tum thu hi a sawi a, constitution kalh anga sawi pawh thil dik lo a ni, a ti. "CAA hi dan kalh tiin article 14 an sawi ri fo a, article 14-ah hian thil pahnih a awm tih hriat tur a ni. CAA hi chu ramri ṭhen avanga Afghanistan, Pakistan leh Bangladesh-a awm te, sakhuana avanga tihtuhdah tuar si, India rama lo let duhte tan a ni," tiin a sawi.

CAA hman hun chungchanga sorkar lai rinhlelhna chu Amit Shah chuan eptu party-te dawt sawi politics vang mai mai a nih thu a sawi a,"BJP hian 2019 inthlan dawn khan CAA hman a nih tur thu hi kan tiam tawh a, parliament house pahnihah 2019 khan pass nghal a ni bawk. Covid avang khan a dan siam hunah kan tlai phah chauh a ni a, BJP hian kan thutiam hi thuneihna kan chan hma daihin kan tihlawhtling a ni," a ti. CAA hmanga India khua leh tui nihna pek theihnaah Muslim an tel ve loh chhan chu Pakistan, Bangladesh leh Afghanistan-te chu Muslim ram a ni a, heng ramahte hian a hnuaihnung zawk chan chang an nih loh thu leh, a duh tan chuan constitution-in a phal anga khua leh tui nihna an dil theih tho thu a sawi.