Pawngsual tawktu nihna tarlan vangin NCW-in Bhasker, Malviya leh Singh hriattirna pe

National Commission for Women (NCW) chuan Hathras, Uttar Pradesh-a hmeichhe pakhat pawngsual rawn tawktu nihna an tarlan avangin BJP IT cell chief Amit Malviya, Congress leader Digvijay Singh leh actress Swara Bhasker-te chu insawifiah turin  hriattirna a pe. 

NCW chuan heng mi pathumten Twitter-a  hemi chungchang an post-na chu paih nghal tur leh, hetiang thil hi tinawn tawh lo turin a hriattir nghal bawk. 

Twitter lamah pawngsual tawktu thlalak hi eng emaw zat post a awm thu NCW chuan a sawi a, Bhasker, Malviya leh Singh-ten thlalak an post-te pawh an follower-ten social media lamah  nasa takin an tidarh a, hei hi danin a khap tlat a ni tih a sawi. 

September 14 khan Dalit hmeichhe pakhat chu Hathras-ah mi paliin an pawngsual rawn a, Delhi-a Sardarjung hospital-ah enkawl a nih hnuin a thi a ni. A thih zanah hian a chhungte remtih lohnain a ruang pawh halral nghal nia sawi a ni. He pawikhawihna thleng ram pum a nghawng a, hmun tam takah pawngsual tawktu leh a chhungte tana rorelna dik phutin nawrh huaihawt a ni. 

Congress party bakah eptu party hrang hrangte chuan pawngsual tawktu ruang hmanhmawh taka halral a nih chungchangah chief minister Yogi Adityanath kaihhruai BJP sorkar chu na takin an sawisel. Police-te chuan buaina nasa zawk a chhuah hlauhthawn thil avangin he thil hi an ti niin sawi mah se, eptute chuan an pawm lo tih an sawi.