Hotel leh airport-a mei zukna hmun titawp turin sorkar laipui ngen

Khawvel puma March thla Nilaini vawi hnihnaa 'No smoking day' hman ṭhin pualin, India rama doctor, cancer natna vei leh hotel neitu intel khawmte chuan sorkar laipui hnenah hotel, airport leh restaurant-a mei zukna hmun (Smoking area) siamte chu titawp turin an ngen.

No smoking day denchhen hian Max institute of cancer care chairman, Dr. Harit Chaturvedi chuan sorkar laipuiin Cigarettes and Other Tobacco Products (Prohibition of Advertisement and Regulation of Trade and Commerce Production, Supply and Distribution) Act (COTPA), 2003 siam ṭhaa, India ram mei zu lo rama siam tura hmalakna an nei chu a lawm thu sawiin, hemi rual hian hmun hrang hranga mei zukna hmun siamte chu tihtawp a ṭul thu a sawi. "Mei zuk hian kan lûng hnathawh leh taksaa natna dotu a tichhia a, hotel leh restaurant vela mei zukna hmun siam hi mei zu lo rama India siam tur chuan tihtawp vek a ngai a ni. Heng mei zukna hmun siamte hian COTPA duhdan an zawm lo a, secondhand smoke avangin mipuiin an tuar a ni," a ti.

COTPA, 2003 hnuaia section 4 hmang hian sorkar laipui chuan puipunna leh mipui kal khawmna hmunah reng reng mei zuk a khap a, mahse, he danah vek hian mipui pun khawmna hmun ṭhenkhat, hotel, restaurant leh airport-ah te mei zukna hmun siama, heng lai hmuna mei zuk erawh a phal thung a ni. Sorkar laipui chuan COTPA, 2003 hi siam ṭha turin 2020 aṭang khan a buaipui leh mek a, COTPA amendment bill, 2020 pawh parliament-ah put luh a ni tawh a ni.