One Nation, One Election panel-in President hnenah report theh lut

One Nation, One election zir chianna nei tura high level committee din, president hlui Ram Nath Kovind-a kaihhruai panel chuan nimin khan president Droupadi Murmu hnenah an zir chianna report an theh lut.

Panel member-te hian President hi a chenna, Rashtrapati Bhawan-ah hmuin, report an buatsaih hi an hlan a ni. Report bu hi phek 18,626-a chhah, One Nation, One Election-in a nghawng tur zawng zawng leh mithiamte ngaihdan an lakna bakah ni 191 chhunga zir chianna an neihte ziah lan a ni. President hnena report an theh luh chungchangah hian Ram Nath Kovind chuan panel member-te'n ram puma a ruala inthlan neih chu an thlawp thu a sawi. Panel report-a tarlan a nih danin, Lok Sabha leh state assembly inthlan a ruala neih phawt hnua, municipal leh panchayat inthlante neih leh rawt a ni a, hei hi a lehpek aṭang chuan a ruala neih vek tawh tur a ni ang.

Sorkar laipuiin a din, 'One Nation, One Election' zir chianna nei tur panel hi September 2, 2023 khan din niin, he panel hi India rama inthlan zawng zawng a rual tlanga neih chungchanga kalpui dan ṭha zawk zawnga, harsatna awm thei hrang hrang; hung house, no confidence motion, defection leh a dangte pumpelh theih dan tura rawtna siam tura din a ni.