PM a nih hunah Farm law nuaibo turin Rahul-a ngen

Punjab chief minister Capt. Amarinder Singh chuan Indian National Congress (INC) hruaitu Rahul Gandhi chu prime minister a nih hunah black law tia sawi, farm law pathum chu nuaibo turin a ngen.

Thawhṭanni khan Punjab-a Bhawanigarh-ah farm law pathum duhlohna lantir nan rally buatsaih a ni a, he hunah hian Amarinder Singh chuan farm law chu a pawm loh thu leh he dan (law) thar hi siamṭhat theih a nih thu kalkhawmte hmaah a sawi. 

Lok Sabha inthlan a awm leh hunah chuan an party chu an chak ngei dawn thu Amarinder chuan sawiin, an party aṭanga prime minister candidate Rahul Gandhi hnenah chuan PM a nih hunah he black law pathum te hi nuai bo turin a ngen a ni.

Amarinder chuan farm law thar hian mi rethei, loneitute hlawkna tur a dal dawn niin a sawi a, loneitute chunga dik lo taka rorel-ah BJP sorkar chu a puh. Thawhṭannia Bhawanigarh-a farm law pathum duhlohna rally neihah hian Rahul bakah, Punjab-a AICC general secretary Harish Rawat, Punjab Congress chief Sunil Jakhar, minister Balbir Sidhu, Vijay Inder Singla, Rana Gurmit Sodhi leh Rajya Sabha MP Deepender Hooda-te pawh an tel.

Rahul Gandhi pawhin thu sawiin, Narendra Modi chuan demonetisation leh GST hmanga sumdawng dawrkai tenau zawkte a tihchhiat ang khan, he farm law pathum hmang hian mi rethei zawk, loneitute leh inhlawhfate chu tihchhiat an ni dawn, a ti.

Gandhi chuan India ramin lo neih lamah tihdan phung thara kal a mamawh hle tih a sawi a, thlai thar zawrhna tur tam tak siam belh mamawh a nih thu Rahul chuan sawiin, "MSP (minimum support price) hi  loneitute tan a ruahmansak ngei ngei tur a ni tih sorkar chuan a tichiang tur a ni a, loneimite tan hmasawnna ruhrel (infrastructure) chu sorkar chuan a ngaithuahsak tur a ni bawk. Hei bakah hian loneituten an thil tharchhuah an dahna tur sorkar chuan a ruahmansak tur a ni," a ti. Hengte hi India rama loneitute mamawh dik tak a nih thu a sawi.     

Rahul Gandhi hi farm law duh lohna rally, 'Kheti Bachao' hmangin Punjab-ah a awm mek a, hemi hnu hian Haryana-ah he rally hi chhunzawm turin a kal leh ang.