CAA hnuaia dan zam chungchang Supreme Court-in March 19-ah a ngaihtuah dawn

Supreme Court chuan sorkar laipuiin Citizenship Amendment Act, 2019 (CAA), dan a zam leh hman tura a puan chungchanga petition theh luhte chu March 19-ah a ngaihtuah dawn.

Petition theh luttu hi Indian Union Muslim League (IUML) niin, IUML hian CAA kaihhnawihah hian petition hrang hrang 237 zet a theh luh tawh a, CAA-in sakhaw vawn denchhena khua leh tui nihna a pe thei chu inthliar hranna dik tak a ni an ti. IUML bakah hian Democratic Youth Federation of India aiawhin advocate Subhash Chandran K.R chuan CAA stay tura ngenna petition hi a theh lut ve bawk.

IUML aiawha ding, advocate senior, Kapil Sibal chuan,"He (CAA) dan hi kum 2019 khan pass a ni a, a hman dan tura dan zamte chu kum li leh a chanve zet a ral hnu, Lok Sabha inthlan hun puan a nih hma lawka puan zar a ni. He dan hnuaia khua leh tui nihna pek hi sut theih a ni lo a, chuvangin, he dan stay tura kan ngenna hi min ngaihthlaksak turin ka ngen che u a ni," tiin, Chief Justice of India, DY Chandrachud ṭhut, judge pathum awmna bench hmaah a sawi.

Supreme Court chuan petition 237-te hi a vaiin March 19-ah hian ngaihtuah a nih tur thu a sawi a ni.