Global human development index-ah India-in hma a sawn

United Nations Development Programme (UNDP) chuan global Human Development Index (HDI) report, 2022 tichhuakin India chu 2021-a 135-na aṭangin 2022-ah hian 134-ah a chho a ni.

Human Development Index (HDI) hi ram chhunga cheng mihringte'n zirna, hriselna leh eizawnna kawnga hma an sawn dan leh hmasawnna kawng an neih ṭhat dan aṭanga teh a ni. UNDP global HDI report-a tarlan a nih danin, kum 2021 khan India-a nau piang hi kum 67.2 dam theia beisei a ni a, hei hi 2022-ah kum 67.7-ah a sang chho a ni. Expected Years of Schooling (EYS), mi nawlpuiin sikul an kal hun chhung chu kum 11.9 aṭangin kum 12.6-ah chho bawkin, ram chhunga chengte sum lak luh, Gross National Income (GNI) pawh 2021 aiin a sang zawk bawk.

UNDP-in HDI report a siamah hian ram 193 an tel a, pakhatna hi Switzerland niin, India ṭhenawm China leh Sri Lanka-te chu 75-na leh 78-na te niin, Bhutan chu 125-na a ni a, Bangladesh pawh India aia sangah awmin, 129-na a ni bawk. Hetih lai hian India ṭhenawm ram tho, Nepal chu 146-na niin, Pakistan chu 164-na a ni thung.