Engineering college 11 khar mai theih dinhmunah ding

Anna University chuan academic year 2024-2025 atana engineering college 87-in zirlai an neih theih zat pangngai aia tam, zirlai lak belh theih an dilna chu phalsak an ni rih dawn loh tih an puang. Anna university hian heng engineering college 87 zinga 11 hi khar mai theih dinhmuna an din thu leh, zirlaite pawh college danga sawn an ngaih tur thu an sawi.

Vice-Chancellor, R. Velraj chuan college khar mai theih dinhmuna dingte hian kum li chhung chu zirlai an neih theih aia 5%-a tlem an neih char char thu sawiin,"Kum thum chhung a zawna zirlai an neih theih aia 5%-a tlem zawk zirlai an neih avangin chumi behchhan chuan notice te kan pe a, an dinhmun siam ṭha turin kan hriattir a ni. Heti chung hian heng college-te hian hmasawnna an neih theih chuang loh avangin, syndicate chuan khar mai duhna hi an nei a ni," a ti. Vice-Chancellor hian engineering college 76 zette chu seat tihpun an dilna hnawlsak an nih thu a sawi bawk. Official ṭhenkhat chuan engineering college, zirlai an neih theih zat aia 25%-a tlem an nei a nih chuan thu leh awm loin college chu khar tur a nih thu an tarlang a ni.

All India Council for Technical Education (AICTE) chuan engineering college che ṭhate chu zirlai lak belh an phalsak thu hi an lo sawi tawh a, hei hian zirlaite zingah seat chan loh hlauhna a tihtlem phah an beisei. Hei vang hian college ṭhenkhatin AICTE aṭanga zirlai lak theih zat tihpun phalna an hmuh a, hma an lak nghal theih nan, university-te chuan No Objection Certificate (NOC) an pe chhuak tawh bawk a ni.