Loneitute'n BJP sorkar paihthlak an duh thu an sawi
Samyukt Kisan Morcha (SKM) bultuma India ram hmun hrang hrang aṭanga loneitu kal khawmte chuan Ningani khan Delhi-a Ramlila Maidan-ah Kisan Mahapanchayat neiin, Lok Sabha inthlan lo awm tura BJP sorkar paihthla tura hmalak an tum thu an tarlang.
Loneitute hian Minimum Support Price (MSP) fix tura dan siam leh thil dang phutin sorkar laipui hi an nawr mek a, Delhi pana kawng zawh an huaihawt chu Delhi ramriah dan an nih avangin Shambhu leh Khanauri-ahte awmhmun khuarin an awm mek bawk. Hetih lai hian Ningani khan state hrang hrang aṭanga loneitute ko khawmin Mahapanchayat hi buatsaih a ni a, BJP chu Swaminathan Commission-in a rawt anga MSP an kalpui loh avanga chhan let ngei ṭha an tih thu te an sawi a ni. SKM hruaitu, Ashok Dhawale chuan MS Swaminathan chawimawina dik tak chu Bharat Ratna pek ni loin, hmathlir a neih anga MSP kalpui hi a ni zawk tiin, prime minister Narendra Modi kaihhruai sorkar hnuaiah kum riat chhungin loneitu nuai khat chuang an intihlum tawh niin a sawi bawk.
Sorkar laipui chu sumdawng liante duhsak leh loneitute hmakhua ngai lohah puhin, loneitute hian March 23-ah BJP dodalna leh democracy chhanhimna ni hmangin nawrh huaihawt leh an tum thu an sawi. Nawrh huaihawt hi SKM chuan Kheri aṭanga Lok Sabha seat chuh tura BJP-in minister of state for home, Ajay Mishra Teni a dah leh vang a nih thu an tarlang a ni. Lakhimpur Kheri-ah hian kum 2020-2021-a loneitute nawrh lai khan loneitu palite chu rawng taka thah an ni a, he inthahna phenah hian loneitute chuan Ajay Mishra Teni hi a inhnamhnawih nia an hriat thu an sawi a ni.
Mahapanchayat-ah hian SKM chuan Punjab leh Haryana inrinaa loneitu inkhuarte leh police-te innawr buainaa loneitu thi leh hliamte avangin union home minister, Amit Shah leh Haryana chief minister, Manohar Lal Khattar laka action lak an phut thu an tarlang. Mahapanchayat-ah hian BJP sorkar dodal tura mipui zawng zawng ṭanho a ṭul tawh thu te, BJP chu ram an sawisak avanga hrem let ve an ngaih thute an sawi. Loneitute hi central trade union 10 laiin an thlawp thu an sawi a ni.