Lok Sabha election 2024 : Ram pumah vote nei mi vbc 96.8 an awm

Election Commission of India (ECI) Chief Election Commissioner (CEC), Rajiv Kumar chuan Inrinni khan kum 2024, 18th Lok Sabha atana inthlanna chu April 19 aṭanga June 1 thleng neih a nih tur thu a puang. Rajiv Kumar hian inthlan hi thawh sariha neih a nih tur thu leh, June 4-ah vote chhiar a nih tur thu a sawi bawk.

Kumin inthlan turah hian ECI hian ruahmanna hrang hrang a siam a, kum 85 chung lamte'n vote an thlak theihna turin anmahni in lamah vote thlaktir tur a ni dawn a, pianphunga midang phak lohna 40% nei chinte tan in lama vote thlaktir hi kalpui tum a ni bawk a ni. ECI hian Manipur tualchhung buaina avanga vote neihna constituency chhuahsana tlanchhiate tan special polling station an buatsaih dawn bawk a, tualchhung buaina avanga mahni in leh lo tlansante hian an awmna relief camp-ah vote an thlak thei dawn a ni.

ECI-in an chhinchhiah danin India rama vote nei zawng zawng hi mi vbc. 96.8 an awm a, heng zinga vbc. 49.72 hi mipa niin, hmeichhia vbc. 47.1 an ni a, vawi khat vote thlakna tur mi vbc. 1.82 an awm bawk. Kum 85 chung lam vote nei hi nuai 85 awmin, rualbanlo vote nei nuai 88.4 an awm a, kum 100 chung lam vote nei, mi nuai 21.18 an awm bawk niin an tarlang.

CEC hian Lok Sabha inthlan neih rual hian Andhra Pradesh, Arunachal Pradesh, Odisha leh Sikkim state assembly-te inthlan neih a nih tur thu sawiin, state hrang hrang assembly-a constituency 26 zetah by-election neih tel a nih tur thu a tarlang bawk a ni. Kum 2024 Lok Sabha inthlan neih tur hi India rama inthlan hun chhung rei ber dawttu tur a ni dawn a, a rei ber ṭum chu inthlan hmasak ber, September 1951 - February 1952 chhunga neih kha a ni.

Vote thlak dan tura ruahmanna :

Thawh khatna : April 19-ah neih a ni dawn a, Jammu & Kashmir, Uttarakhand, Uttar Pradesh, Rajasthan, Madhya Pradesh, Maharashtra, Chhattisgarh, Bihar, West Bengal, Sikkim, Meghalaya, Assam, Mizoram, Nagaland, Arunachal Pradesh, Manipur, Lakshadweep, Andaman & Nicobar island, Dadra Nagra & Haveli leh Puducherry aṭanga constituency 102-ah vote thlak a ni ang.

Thawh hnihna : April 26-ah hian Rajasthan, Karnataka, Kerala, Jammu & Kashmir, Uttra Pradesh, Madhya Pradesh, Maharashtra, Bihar, Chhattisgarh, West Bengal, Assam, Tripura leh Manipur aṭangin constituency 89-ah vote thlak a ni ang.

Thawh thumna : May 7-ah hian Jammu & Kashmir, Haryana Uttar Pradesh, Madhya Pradesh, Gujarat, Maharashtra, Karnataka, Chhattisgarh, Bihar, West Bengal leh Assam-a constituency 94-ah vote thlak a ni dawn a ni.

Thawh lina : May 13 hian Jammu & Kashmir, Madhya Pradesh, Maharashtra, Uttar Pradesh, Andhra Pradesh, Telangana, Orissa, Jharkhand, West Bengal leh Bihar aṭangtein, consituency 96-ah vote thlak a ni ang.

Thawh ngana : May 20-ah, Ladakh, Jammu and Kashmir, Maharashtra, Orissa, Uttar Pradesh, Jharkhand, West Bengal leh Bihar-a constituency 49-ah vote thlak tur a ni dawn a ni.

Thawh rukna : May 25-ah hian Haryana, Delhi, Uttar Pradesh, Bihar, Jharkhand, West Bengal leh Orissa aṭangin constituency 57-ah vote hi thlak tur a ni.

Thawh sarihna : June 1-a neih turah hian, Himachal Pradesh, Punjab, Uttar Pradesh, Bihar, Jharkhand, Orissa, leh West Bengal-a constituency 57-ah vote thlak a ni ang.