MHA-in J&K-a pawl eng emaw zat khapna a tichhuak

Ministry of Home Affairs (MHA) chuan Jammu & Kashmir-a ram inṭhen hranna hawi zawnga chet la ṭhin nia a hriat, Jammu and Kashmir Peoples Freedom League (JKPFL) leh Jammu and Kashmir Peoples League (JKPL) hnuaia peng hrang hrang, Hurriyat Conference te nena inzawmna nei zawng zawngte chu Unlawful Activities Prevention Act (UAPA) hmanga khap an nih thu a chhuah.

MHA hian an thuchhuahah hian Jammu and Kashmir Peoples League peng pali; KPL (Mukhtar Ahmed Waza), JKPL (Bashir Ahmad Tota), JKPL (Ghulam Mohammad Khan) leh Yaqoob Sheikh-led JKPL (Aziz Sheikh) te chu UAPA hnuaia danin a phal loh pawl an nih thu an tarlang a ni. JKPFL leh JKPL aṭanga pawl peng hrang hrangte khapna a chhuah bakah hian, home ministry hian Jammu Kashmir Liberation Front (JKLF) khapna chu kum nga chhung atana pawhsei chhunzawm leh a nih thu a tarlang bawk. Heng pawl khapna thuchhuah chungchangah hian, union home minister Amit Shah chuan, pawl khapna an chhuaha telte hi firfiaka chetna thlawp zawnga che leh, Jammu & Kashmir inṭhen hranna hawi zawnga chet an lak ṭhin thu a sawi.