Rahul Gandhi-a'n Bharat Jodo Nyay Yatra titawp

Rahul Gandhi chuan India ram state hrang hrang fang kuala hun a hmanna; Bharat Jodo Nyay Yatra chu Inrinni khan Mumbai thlengin, tihtawp a nih thu a sawi zui nghal.

Gandhi hian nimin khan south Mumbai-ah 'Nyay Sankalp Padyatra' a nei a, Mani Bhavan aṭanga kalin, kum1942-a Quit India movement inṭanna, August Kranti Maidan thleng a kal. He hunah hian INDIA bloc member eng emaw zatin an ṭawiawm.

Bharat Jodo Nyay Yatra hi Dadar Chaityabhoomi-a Dr. BR. Ambedkar-a memorial-ah Preamble chhiarin tihtawp a ni. Hemi hma hian Gandhi hian Mumbai-a Dharavi slum, Asia rama slum area lian ber chu tlawhin, thu a sawi. Rahul Gandhi chuan,"Dharavi hi India ram thil siamchhuahna hmunpui a ni tur a ni. Kan rama talent awm tamna hmun a ni a, in thiamnate hi chawikang turin thlawpna in mamawh a ni. Bank hian loan pe tur che u a ni a, chu erawh Adani-a hian a ruksak zel si che u a, Prime Minister, Narendra Modi-a'n a thlawp tlat bawk si," tiin, ram chu an ta a nih thu sawiin, Gautam Adani a bei zui bawk a ni.

Yatra hi kilometre 6,000 zeta thui neih niin, January 14, 2024 khan, Manipur-ah bul ṭan a ni a, March 12 khan Gujarat aṭangin Maharashtra hi a lut a, Inrinni khan Mumbai hi lutin, tihtawp a ni zui a ni. Yatra neih a nih chhung hian state hrang hrang 16-a district 110 zet tlawh a ni a, ni 63 chhung hun hman a ni bawk. Yatra tawp ni hian Rahul Gandhi-a farnu, Priyanka Gandhi Vadra chuan yatra hi a zawm ve a ni.