Party tana pawisa thawhtu nihna kimchang tarlang turin Supreme Court-in State Bank of India a hriattir

Chief Justice of India (CJI), DY Chandrachud kaihhruai, judge panga awmna Supreme Court bench chuan nimin khan State Bank of India (SBI)-in party-te tana pawisa thawh ṭhin (electoral bond) chungchangah, a petute nihna leh dinhmun kimchang an tarlan loh thu sawiin, thuchhuah an siam tawh anga electoral bond data kimchang pe chhuak turin a hriattir.

February thla khan SC hian nihna tarlang loa political party-te hnena ṭanpuina sum pek ṭhin (electoral bond scheme) chu constitution kalh a nih thu sawiin, SBI chu electoral bond scheme hnuaia political party-te tana ṭanpuina sum dawng thei tura phalna nei an nih angin, April 12, 2019 leh February 15, 2024 inkara party zawng zawngin pawisa an dawn leh a petute nihna kimchang tarlanna, March 6-ah, Election Commission of India (ECI) hnenah theh lut turin a hriattir a ni.

SBI hian SC hnenah hian June 30 thleng hun pe turin dil mah se, SC hian a hnawl a, March 12 ral hmaa theh lut turin a hriattir leh a ni. Hemi hnu hian SBI-in ECI hnena electoral bond data an theh luh, ECI-in March 15-a a tlangzarhah hming tarlan lohte a awm."Electoral bond chungchanga sum thawhtu nihna kimchang tarlan hi SBI laka kan phut a ni. Min dil ula kan pe ang che u tih chin ang chiahin SBI hi an kal a, hei hi SBI chet dan tur a ni lo. SBI hi a dik a ngai," tiin thubuai ngaihtuahnaah hian Supreme Court judge te chuan an sawi.

SC chuan SBI hi electoral bond chungchangah zep ṭhen a nei lo tih lantirna turin March 21-ah affidavit theh lutin a hriattir a, party-te tana sum thawhtu nihna kimchang tarlan chu a hranpaa thupek chhuah ngai loin, February 15, 2024-a thuchhuah an siamah a tel nghal thu SC chuan an tarlang.

Electoral bond scheme kaltlang hian party hrang hrangte chuan ṭanpuina sum an dawng thei a, heta pawisa petute hi an nihna tarlan a ṭul thu SC hian a sawi a ni. SBI-in SC ngenna anga ECI hnena report an theh luha a lan danin, kum liam ta chhunga electoral bond aṭang sum dawng hnem ber chu Bharatiya Janata Party (BJP) an ni a, Rs. vbc. 6,987 zet an dawng nia tarlan a ni. Hetih lai hian BJP tana pawisa pe tam zualtu hi SBI hian a tarlang lo a, BJP chuan electoral bond scheme hnuaiah an party tana sum thawhtute lo chhinchhiah leh an nihna kimchang lo hriat chu phut a nih loh avanga pawisa petute an hriat vek loh thu an sawi. BJP bakah hian Trinamool Congress (TMC) leh Indian National Congress (INC) te chu electoral bond kaltlanga sum dawng hnem zual an ni a, heng party-te tana sum thawh nasa zualte hming leh nihna SBI hian a tarlang lo bawk a ni.