Gujarat university buaina kaihhnawihah mi 2 man

Gujarat university hostel-a Pathiannia buaina chhuak kaihhnawihah Ahmedabad police-te chuan mi pahnih; Hitesh Mewada leh Bharat Patel-te an man. Buaina chhuakah hian ram dang zirlai pangain hliam an tuar a ni.

Ahmedabad police-te chuan Gujarat univeristy hostel-a buaina chhuak hi an chhui zui mek a ni. Buaina chhuakah hian ram dang aṭanga zirlai, South Africa, Sri Lanka, Uzbekistan, Afghanistan leh Tajikistan mite chuan hliam an tuar a, South Africa leh Tajikistan mi zirlaite hi damdawi inah dah luh an ni bawk. Buaina chhuaka inhnamhnawiha puh pahnih; Hitesh Mewada leh Bharat Patel te hi police-te chuan Indian Penal Code (IPC), section 143, 147, 323, 324, 337 leh 447-te hmanga thubuai siamsakin an man a ni.

Buaina chhuah hma hian ram dang zirlaite hian namaz an hmang nia hriat a ni a, hei hi university zirlai ni lo, pawn lam mi ṭhenkhat chuan ngaithei loin an au el a, buaina a chhuak chhunzawm ta a ni. Police-te chuan pawn lam aṭangin mi 20-25 velin university hostel hi an luh chilh a, ram dang zirlaiin namaz an hmang hi sawiselin, mosque-a ti turin an nawr niin an tarlang. Ahmedabad police commissioner, GS. Malik chuan pawn lam aṭanga hostel luh chilhtute hian ram dang mi hostel-a awmte room pawh an suasam thu sawiin, tun hma pawha hetianga sakhuana avanga buaina thila na taka action an lak tawh ṭhin thu leh, tun dinhmunah boruak a ṭhat tawh rih thu te a sawi bawk.

Gujarat university thuneitute chuan Pathiannia buaina chhuak avang hian ram dang zirlaite bik chu hostel hrana dah an nih tur thu sawiin, hostel venhimna hna thawk tura sipai dah turin ngenna an siam bawk. Ram dang mi zirlai awmte tan advisory committee din nghal a ni bawk a ni. Gujarat university-ah hian ram dang mi zirlai 300 chuang an awm niin an tarlang.