Bihar-a CAA hman a nih loh tur thu JD(U) party leader-in a sawi

Bihar-a rorel lai, National Democratic Alliance (NDA) hnuaia Janata Dal (United), BJP leh party dangte thawhho mek karah, Nitish Kumar-a party Janata Dal (United) party leader, Khalid Anwar chuan sorkar laipuiin Citizenship Amendment Act (CAA) a kalpui mek chu Bihar-a hman a nih ve loh tur thu a sawi.

Khalid Anwar hian JD(U) hotu leh chief minister ni mek, Nitish Kumar-a'n Bihar-a CAA hman ve a nih loh tur thu hi a sawi tih tarlangin,"CAA hi Bihar-ah hman ve a ni lo ang. CM Nitish Kumar pawhin kan state-ah Bihari vbc. 13 an awm thu leh, CAA emaw, National Register of Citizen (NRC) emaw, National Population Ragister (NPR) pawh ni se, a engmah hi hman a ṭulna a awm lo a ti. Nitish hian thuneihna a neih chhung chu tu mahin CAA hi an hlauh a ngai lo," tiin Pathianni khan chanchinbu mite hmaah a tarlang.

Bihar-ah hian thla hmasa mai khan Nitish Kumar-a kaihhruai JD(U) hian INDIA an chhuahsan a, BJP kaihhruai NDA zawmin sorkarna an siam a, NDA nena thawhhona an neih kara BJP hmalakna, CAA dodal zawnga ṭawngkam an neih hian an thawhhona boruak a tichhe thei dawnin mi tam tak chuan an ngai a ni. Hetih lai hian Anwar hian BJP leh JD(U) thawh dun hma pawhin, Nitish Kumar-a kaihhruai sorkar chuan an state-a NRC emaw, NPR hman a nih lohna tur hian assembly-ah thu an pass tawh thu a tarlang bawk.