Ram khawpui zinga boruak bawlhhlawh ber Delhi

Switzerland-a IQAIR-te'n World Air Quality report, 2023 an tihchhuahah India chu khawvel ram hrang hrang zinga Bangladesh leh Pakistan dawta boruak bawlhhlawh berna ram a ni. Delhi chu khawvel ram hrang hrang khawpui (capital city) zinga boruak a bawlhhlawh berna khawpuiah thlan a ni bawk.

Kum 2022 khan India hi khawvela boruak bawlhhlawh berna ram pariatna a ni a, kum 2023 report-ah erawh boruak bawlhhlawhna hi nasa chhoin pathumna a ni. Kum 2022-a India ram boruak bawlhhlawh, Particulate Matter (PM2.5) chu kum khat chhunga chawhrualin 53.3 micrograms per cubic metre a ni a, kum 2023-ah erawh India-ah hian boruak tibawlhhlawhtu langsar tak; PM2.5 chu cubic metre khat zelah microgram 54.4 anga chhut a nih tawh thu IQAir chuan an tarlang.

A ram pum anga ram boruak bawlhhlawh ber pathumna a nih bakah hian ram khawpui (capital city) zingah Delhi chu boruak bawlhhlawh ber a ni a, kum 2023 khan Delhi-ah hian PM2.5 hi 92.7 micrograms per cubic metre awm anga chhut a ni. 2018 aṭanga lakin, Delhi hi khawpui bawlhhlawh bera thlan a nih ṭum lina a ni tawh bawk. Ram khawpui bakah, ram chhunga khawpui lian hrang hrang tehnaah pawh India ram, Bihar-a Begusarai khawpui chu khawvela boruak bawlhhlawh berna hmuna thlan a ni bawk a, Begusarai-ah hian chawhrualin 2023 chhung khan PM2.5 hi 118.9 microgram per cubic metre anga chhut a ni.

IQAir-te hian report buatsaih nan hian air quality monitoring station 30,000 chuang data an en bakah, air quality sensor hrang hrang, zir chianna neih leh sorkarin a hman te, mimal leh pawlin an neihte lak tel vek a nih thu an sawi a, 2023 report atan hian ram 134-a hmun 7,812 zet an endik thu an tarlang bawk. Boruak bawlhhlawh hi khawvel puma mi pakua zela pakhat thihna anga ngaih a ni a, World Health Organization (WHO) chuan boruak bawlhhlawh avang hian khawvel pumah, a hun hmaa thi mi nuai 70 an awm ziah niin an tarlang. Boruak bawlhhlawh tehnaa PM2.5 hip luh nasat hian asthma, cancer, stroke leh lung ṭha lo thlengin a thlen thei a, naupangah diabetes leh natna benvawn neih theihna a tihsan bakah, rilru lam thlengin a nghawng thei bawk.